ແມ່ນ້ຳເນຣັນຊະຣາທີ່ເຫືອດແຫ້ງ

ເມື່ອວັນທີ 13 ທັນວາ ຂ້າພະເຈົ້າໄດ້ມີໂອກາດຍ່າງຂ້າມແມ່ນ້ຳເນຣັນຊະຣາ ດ້ວຍຂົວໃນທ່າມກາງ ພຣະສົງແລະພຸດທະສາສະນິກະຊົນ ທີ່ພ້ອມພຽງກັນ ເພື່ອເດີນທັມມະຍາຕຣາ ໄປຍັງບ້ານເກົ່າຂອງ ນາງສຸຊາດາ ຜູ້ທີ່ຖວາຍເຂົ້າມັດທຸປາຍາດ(ເຂົ້າທີ່ປະສົມກັບນົມແບ້) ເຊິ່ງນາງໄດ້ຖວາຍແກ່ພຣະ ພຸດທະເຈົ້າ ກ່ອນທີ່ຈະໄດ້ຕັດສະຮູ້.

ຫລັງຈາກໄດ້ໄປເຮັດພິທີໄຫວ້ພຣະສູດມົນ ແລະທາງເຈົ້າພາບໄດ້ຖວາຍເຂົ້າ ມັດທຸປາຍາດແກ່ພຣະ ສົງແລ້ວ ກໍພາກັນເດີນທາງກັບສູ່ສະຖານທີ່ສັນເພນໃນກາລະຈັກຣ໌ (ເປັນສະຖານທີ່ກະກຽມເປີດພິທີ ແລະສັນພັດຕາຫານ) ແຕ່ຂ້າພະເຈົ້າບໍ່ໄດ້ກັບພ້ອມໝູ່ ຄືໄດ້ລໍຖ້າຖ່າຍຮູບທີ່ບ້ານນາງສຸຊາດາ ພໍດີມີ ນັກຮຽນແລະນາຍຄູຢູ່ໂຮງຮຽນໃກ້ໆນັ້ນ ໄດ້ພາຂ້າພະເຈົ້າພ້ອມດ້ວຍພຣະສົງອີກອົງໜຶ່ງເດີນທາງ ຜ່ານສວນຜັກແຫ່ງໜຶ່ງແລ້ວແວ່ໄປທາງແຄມແມ່ນ້ຳເນຣັນຊະຣາ ເຊິ່ງຢູ່ຝັ່ງກົງກັນຂ້າມກັບເຈດີທີ່ ມະຫາໂພທິມະຫາວິຫາຣ ດັ່ງທີ່ເຮົາແນມເຫັນໃນຮູບນີ້.

ພວກນາຍຄູ ແລະນັກຮຽນຜູ້ໜຶ່ງ ທີ່ເປັນນ້ອງຂອງນາຍຄູ ໄດ້ອະທິບາຍສູ່ຂ້າພະເຈົ້າຟັງວ່າ ແຄມ ຝັ່ງນີ້ ເປັນບ່ອນທີ່ພຣະພຸດທະອົງອະທິດຖານລອຍພາຖາດຄຳ ເຊິ່ງນາງສຸຊາດາໄດ້ຖວາຍມາ ພ້ອມກັບເຂົ້າມັດທຸປາຍາດ ເພື່ອສ່ຽງເຖິງກັນບັນລຸສັບພັນຍຸຕຕະຍານ. ຂ້າພະເຈົ້າ ຈິ່ງເກີດຄວາມ ສັງເວດສະຫລົດໃຈຂື້ນວ່າ ແມ່ນ້ຳແຫ່ງນີ້ ໄດ້ເຫືອດແຫ້ງໄປແລ້ວ ແລະພະຍານາກຕົນໜຶ່ງທີ່ມີ ນາມວ່າກາລະນາຄຢູ່ໃນບາດານນັ້ນຈະໄປຢູ່ໃສ. ພະຍານາຄຕົນນັ້ນ ເປັນຜູ້ທີ່ນອນຢູ່ໃນບາດານ ແຫ່ງນີ້ເປັນເວລາຍາວນານຊົ່ວກັບຊົ່ວກັນມາແລ້ວ ເມື່ອໄດ້ຍິນສຽງພາຖາດກະທົບກັບພື້ນ ຈິ່ງສະດຸ້ງ ຕື່ນຂື້ນຈາກຄວາມດັບໄຫລ ແລ້ວອຸທານໃນໃຈວ່າ “ຮຶ ມື້ວານນີ້ກໍມີຜູ້ມາສ່ຽງຖາດ ມື້ນີ້ກໍມີອີກແລ້ວ.” ຄວາມໝາຍຂອງມື້ວານນັ້ນ ໝາຍຄວາມວ່າ ມັນດົນນານແສນນານມາແລ້ວ ແຕ່ພຣະພຸດທະເຈົ້າ ອົງກ່ອນມາຕັດສະຮູ້ພຸ້ນລະ ແຕ່ພະຍານາຄນອນດົນຊື່ໆ ຈິ່ງຄຶດວ່າຫາກໍແມ່ນມື້ວານ. ພະຍາກນາກ ຕົນນີ້ ເມື່ອຊາດກ່ອນ ສະໄໝພຣະພຸດທະເຈົ້າທີ່ມີນາມວ່າ ວິປັສສີ(ຖ້າຈື່ບໍ່ຜິດ)ເຄີຍເປັນສາມະເນນ ອຸປປະຖາກພຣະສົງຈຳນວນ 500 ກວ່າອົງ ມາປະຊຸມກັນ ດ້ວຍການຕົ້ມນ້ຳ ແລະຈັດກຽມຫາສະ ຖານທີ່ພັກເຊົາຕາມທຳນຽມຂອງສົງ ຈິ່ງບໍ່ໄດ້ຢູ່ໄດ້ນອນ ຈິ່ງອະທິດຖານໃນໃຈວ່າ ຂໍໃຫ້ບຸນກຸສົນ ທີ່ເກີດຈາກກາອຸປະຖາກພຣະສົ່ງເຫລົ່ານີ້ ຈົ່ງດົນບັນດານໃຫ້ໄດ້ມີໂອກາດໄດ້ນອນຫລັບສະຖານ ຍ້ອນເຫດນີ້ເອງ ຈິ່ງເຮັດໃຫ້ໄດ້ມີໂອກາດໄປເກີດເປັນພະຍານາກ ນາມວ່າ ກາລະນາຄ(ນາຄແຫ່ງ ການເວລາ) ໄດ້ອາໄສຢູ່ໃນໃຕ້ບາດານແຫ່ງແມ່ນ້ຳເນຣັນຊະຣາແຫ່ງນີ້.

ເຖິງແມ່ນວ່າແມ່ນ້ຳເນຣັນຊະຣາຈະເຫືອດແຫ້ງແລ້ວກໍຕາມ ແຕ່ຍາມກາງເກົ້າກາງສິບ ຈະມີນ້ຳນອງໄຫລເປັນປົກກະຕິໃນຍາມລະດູແລ້ງ ເຊື່ອກັນວ່າ ມີນ້ຳໄຫລຢູ່ໃຕ້ດິນພຸ້ນພະຍານາຄ ຕົນນັ້ນຄືຊິຢູ່ໃນພື້ນພຸ້ນ.

ອັນນັ້ນເປັນເລື່ອງຂອງຄວາມເຊື່ອກ່ຽວກັບພະຍານາຄ ແລະການສ່ຽງພາຖາດຂອງພຣະພຸດທະເຈົ້າ ແຕ່ສິ່ງທີ່ໜ້າສັງເກດກໍຄືວ່າ ຄວາມມະຫັດສະຈັນຂອງພຣະພຸດທະເຈົ້າ ຢູ່ບ່ອນວ່າ ຕອນທີ່ພຣະ ພຸດທະອົງຂ້າມນ້ຳນັ້ນມັນແມ່ນຍາມທີ່ມີນ້ຳນອງເຮືອກໍອາດຈະບໍ່ມີ ນັກປາດທັງຫລາຍເຊື່ອກັນວ່າ ພຣະພຸດທະອົງໄດ້ໃຊ້ຊານສີ່ເພື່ອເຫາະຂ້າມແມ່ນ້ຳເນຣັນຊະຣາແຫ່ງນີ້ ເພື່ອໄປນັ່ງສະມາທິ ຢູ່ພາຍໃຕ້ຕົ້ນສີມະຫາໂພ ກ່ອນຈະໄດ້ບັນລຸເປັນພຣະອະຣະຫັນຕະສັມມາສັມພຸດທະເຈົ້າ.

ແລະອີກຢ່າງໜຶ່ງກໍຄືວ່າ ແມ່ນ້ຳແຫ່ງນີ້ ເມື່ອຫລາຍສິບປີກ່ອນ ກໍຍັງບໍ່ທັນເຫືອດແຫ້ງ ໃນຍາມລະດູ ແລ້ງແບບນີ້ ແຕ່ດຽວນີ້ປ່ຽນໄປແລ້ວ ຍ້ອນສະພາບແວດລ້ອມຂອງໂລກ ແລະ ອີກບໍ່ນານເມື່ອຫວນ ມາເບິ່ງແມ່ນ້ຳຂອງຢູ່ບ້ານເຮົາ ບໍ່ຮູ້ວ່າ ອີກຈັກປີຂ້າງໜ້າ ຈະເຫືອດແຫ້ງຄືແບບນີ້
ແລະນັ້ນເປັນສິ່ງທີ່ໜ້າເປັນຫ່ວງຕໍ່ວິຖີຊີວິດຂອງຄົນລາວທີ່ອາໄສສາຍນ້ຳຂອງ ເຊິ່ງປຽບເໝືອນ ສາຍເລືອດທີ່ລໍ່ລ້ຽງຊີວິດຕະຫລອດມາ.

ພິທີເປີດສາລາໂຮງທັມຫຼັງໃໝ່ທີ່ວັດເຝີດຕິກ

ເມື່ອວັນທີ 19 ທີ່ຜ່ານມາ ໄດ້ມີພິທີເປີດສາລາໂຮງທັມຫຼັງໃໝ່ ເຊິ່ງເປັນອາຄານເຈັດຊັ້ນ ທີ່ວັດເຝີດຕິກ(ວັດຫວຽດນາມ) ທີ່ນະຄອນຫລວງວຽງຈັນກໍໄດ້ມີຂື້ນ ເຊິ່ງມີພຣະສົງພ້ອມດ້ວຍຊາວພຸດຈາກລາວແລະຫວຽດນາມ ເຂົ້າຮ່ວມເປັນຈຳນວນ ຫລາຍຮ້ອຍຄົນເພື່ອສະເຫລີມສະຫລອງງານບຸນດັ່ງກ່າວ.

ເປັນປະທານໃນພິທີແມ່ນພຣະອາຈານໃຫຍ່ ດຣ.ມະຫາຜ່ອງ ສະມາເລີກ ວ່າການປະທານອົງການພຸດທະສາສະໜາສຳພັນລາວ ພ້ອມດ້ວຍພະນະທ່ານສົມສະຫວາດ ເລັ່ງສະຫວັດ ຮອງນາຍຍົກລັດຖະມົນ ຜູ້ປະຈຳການລັດຖະບານ ພ້ອມທັງເປັນຜູ້ຊີ້ນຳງານສະເຫລີມສະຫລອງນະຄອນຫລວງວຽງຈັນ 450​ ປີ ກໍໄດ້ເຂົ້າຮ່ວມ.

ນອກຈາກນີ້ ພິທີການດັ່ງກ່າວ ຍັງໄດ້ຈັດຂື້ນເພື່ອສະເຫລີມສະຫລອງສອງງານບຸນໃຫຍ່ປະຫວັດສາດຄື ການສ້າງຕັ້ງນະຄອນຫລວງວຽງຈັນ 450 ປີ ແລະການສະຖາປະນາປະເທດ ສາທາລະນະລັດ ປະຊາທິປະໄຕ ປະຊາຊົນລາວ ຄົບຮອບ 35 ປີ ພ້ອມນີ້ກໍເປັນການສະເຫລີມສະຫລອງການສ້າງຕັ້ງເມືອງທາງລອງ ນະຄອນຫລວງຮ່າໂນ້ຍ 1000 ປີ.


Inauguration of Dhamma Sala at Wat Phat Tich in Vientiane.

On 19 November,2010, an inauguration ceremony of new 7-story Dhamma Hall at Chua Phat Tich or Wat Phat Tich(Vietnamese monastery) in Viengchan took place and hundred of Buddhist monks and lay people from Laos and in Vientnam assembled to celebrate the event.

The ceremony was presided over by The Most Ven.Dr.Phong Samaleuk,the Acting President of Lao Buddhist Fellowship Organization(LBFO) and H.E.Somsavath Lengsavath, Deputy Prime Minister of Laos.

The ceremony was also organized to commemorate the two historical events of the 450th Anniversary of Vientiane Capital and the establishment of Lao People's Democratic Republic for 35 years and also to remark to 1000th Anniversary of Thang Long, Hanoi as the capital city.

Burmese Buddhist delegates offered Kathina at Sangha College.

ຄະນະສົງພະມ້າຖວາຍຜ້າປ່າຈຳນວນ 360 ໄກ
ແກ່ຄູອາຈານແລະນັກສຶກສາວິທະຍາໄລສົງ



ເມື່ອວັນທີ 14 ພະຈິກທີ່ຜ່ານມາ ຄະນະສົງຈາກປະເທດພະມ້າ ນຳໂດຍພຣະອາຈານໃຫຍ່ ດຣ.ອາຊິນ ຍານິສສະຣະ (ສີຕະກູໄຊຍາດໍ) ອະທິການບໍດີສະຖາບັນການສຶກສາພຸດທະສາສະໜານານາຊາດຊີຕາກູ Sitagu International Buddhist Academy(SIBA) , ຜູ້ສ້າງຕັ້ງໂຮງໝໍອາຍຸທານະ ແລະເປັນປະທານສະມາຄົມມະຫາວິທະຍາ ໄລພຸດທະສາສະໜາເຖຣະວາດ The Association of Theravada Buddhist Universities (ATBU) ໄດ້ເຂົ້າຂາບຄາຣະວະ ພຣະອາຈານໃຫຍ່ ດຣ.ມະຫາຜ່ອງ ສະມາເລີກ, ວ່າການປະທານອົງການພຸດທະສາສະໜາສຳພັນລາວ ພ້ອມດ້ວຍຄູອາຈານ ແລະນິສິດນັກສຶກສາ ວິທະຍາໄລສົງຈຳນວນ 300 ກວ່າອົງ.

ຈຸດປະສົງຂອງການຢ້ຽມຢາມລາວຄັ້ງນີ້, ພຣະອາຈານໃຫຍ່ ດຣ. ອາຊິນ ຍານິສສະຣະ ແມ່ນເພື່ອຖວາຍຜ້າໄຕ ຈຳນວນ 360 ຊຸດຕໍ່ຄູອາຈານ ແລະນັກສຶກສາພາຍໃນວິທະຍາໄລສົງແລະໄດ້ຕົກລົງຈະໃຫ້ທຶນການສຶກສາຈຳນວນ 20 ທຶນ ແກ່ນິສິດນັກສຶກສາ ວິທະຍາໄລສົງ ແລະນັກສຶກສາສົງລາວ ເພື່ອໄປຮຽນຕໍ່ຢູ່ທີ່ສະຖາບັນການສຶກສາພຸດທະສາສະໜານານາຊາດສີຕະກູ ໂດຍໃຫ້ຮຽນຕໍ່ແຕ່ຂັ້ນປະລິນຍາຕີ ຕໍ່ເນື່ອງເຖິງປະຣິນຍາໂທ.

ນອກຈາກແຜນການການສຶກສາແລ້ວ ພຣະອາຈານໃຫຍ່ ດຣ. ຍານິສສະຣະ ຍັງຈະເປັນເຈົ້າພາບສ້າງພຣະທາດສະເວຊີກອງຈຳລອງ ທີ່ບໍລິເວນມະຫາວິທະຍາໄລພຸດທະສະໜາແຫ່ງປະເທດລາວແຫ່ງໃໝ່ ທີ່ວັດພະບາດແອວຂັນ ເມືອງໄຊທານີ. ພ້ອມນີ້ ກໍໄດ້ຖວາຍພຸດ ທະຮູບອີກສອງອົງ ແລະເພື່ອເປັນການແລກປ່ຽນ ເພິ່ນກໍໄດ້ຂໍພຣະໄຕປິດົກສະບັບພາສາລາວໜຶ່ງຊຸດເພື່ອເປັນ ທີ່ລະລຶກແລະເກັບຮັກສາໄວ້ ທີ່ສະຖາບັນການສຶກສານານາຊາດຊີຕາກູ.

ໃນໄລຍະຜ່ານມາ ສາຍພົວພັນທາງພຸດທະສາສະໜາແລະວັດທະນະທຳລະຫວ່າງສອງປະເທດ ລາວແລະພະມ້າໄດ້ມີມາຍາວນານ ເຊິ່ງໄດ້ມີພະສົງລາວເຮົາໄດ້ໄປສຶກສາພຸດທະສາສະໜາທີ່ພະມ້າເປັນຈຳນວນຫຼາຍແລະກັບມາຮັບໃຊ້ພຸດທະສາສະໜາແລະປະເທດຊາດສືບມາຈົນເຖິງປັດຈຸບັນ ແລະຈະດຳເນີນການພົວພັນຕໍ່ໄປໃນອະນາຄົດຢ່າງບໍ່ຢຸດຢັ້ງ.



Burmese Buddhist delegates offered Kathina at Sangha College.


The Buddhist delegates led by the Most Ven.Dr.Nyanissara, the chancellor of the Sitagu International Buddhist Academy, the founder of the Ayudāna Hospital and also the Chairman of the Association of Theravada Buddhist Universities(ATBU) cordially paid a courtesy visit the Most.Ven.Phong Samaleuk, the Acting President of Lao Buddhist Fellowship Organization(LBFO) and at the same time, he offered 360 set of saffron robes to the teachers and students at the Sangha College in Vientiane on 15 November,2010.

At the same time, the Most Ven.Dr.Nyanissar also awarded scholarship for 20 students from the Sangha College to study at the Sitagu International Buddhist Academy next year, and also he will build a Shwegigon pagoda replica in the new campus of Buddhist University of Laos.

Previously, the religious and cultural cooperation between Laos and Burma have been tied strongly as there are many Lao students have graduated from Burma and returned home to work for the national and religious development and this will continue to grow for further cooperation between the two countries.

ບຸນສົມໂພດພຣະພຸດທະໄຊຍະມະຫາມຸງຄຸນ

ເມື່ອຄືນວັນທີ 12 ທີ່ຜ່ານມາ ທີ່ຫໍທັມມະສະພາ ວັດພະທາດຫລວງເໜືອ ໄດ້ມີບຸນສົມໂພດພຣະພຸດທະໄຊຍະມະຫາມຸງຄຸນຂື້ນ ມີພຣະສົງເຂົ້າຮ່ວມຈຳນວນ 108 ອົງ ພ້ອມດ້ວຍອອກຕົນຍາດໂຍມເຂົ້າມາບວດຂາວຈຳສິນ ຮ່ວມສົມໂພດເປັນຈຳນວນຫລວງຫລາຍ
ງານບຸນດັ່ງກ່າວ ປະກອບມີ ການໄຫວ້ພຣະ ສະມາທານສິນແປດ, ການຟັງເທດ ແລະການຈະເລີນພາວະນາ ເຮັດໃຫ້ຊາວພຸດໄດ້ມີ
ໂອກາດສຶກສາແລະປະຕິບັດທັມໃນຊ່ວງຂ້າມຄືນ ແລະການສ້າງພຣະພຸດທະຮູບເພື່ອປະດິດສະຖານໃຫ້ສາທຸຊົນໄດ້ຂາບໄຫວ້ບູຊາ ເພື່ອນ້ອມ
ລະນຶກເຖິງຄຸນພຣະພຸດທະເຈົ້າແລະທັມມະທີ່ພຣະພຸດທະອົງຕັດສະຮູ້ ແລ້ວນຳມາປະຕິບັດນັ້ນ ນັບວ່າເປັນມະຫາກຸສົນຢ່າງຍິ່ງ ເປັນການສຶບຕໍ່
ພຣະພຸດທະສາສະໜາໃຫ້ຈະເລີນສະຖານພອນຍິ່ງຂື້ນໄປ.

ປະຫວັດໂດຍຫຍໍ້ຂອງພຣະອາຈານມະຫາປາລ ອານັນໂທ

....

....

ງານບຸນລະນຶກເຖິງ 100 ປີ ຊາຕະການຂອງພຣະອາຈານ ມະຫາປາລ ອານັນໂທ

ເມື່ອວັນທີ 24 ຫາ 26 ທີ່ຜ່ານມາ ໄດ້ມີການຈັດງານບຸນສະຫຼອງ 100 ປີ ຊາຕະການມື້ລາງພຣະອາຈານໃຫຍ່ ມະຫາປາລ ອານັນໂທ,ອະດີດເຈົ້າສຳນັກມະຫາພຸດທະວົງສາປ່າຫລວງ ທ່ານເປັນພຣະອາຈານໃຫຍ່ຝ່າຍວິປັດສະນາທຸຣະ ທັງເປັນນັກພັດທະນາ ຜູ່ທີ່ເພັດມະນີແຫ່ງຍຸກຣາຊະອານາຈັກແລະຍຸກລະບຽບໃໝ່. ຜົນງານຂອງທ່ານມີຢ່າງອະເນກອະນັນເໜືອຈະຄະນານັບ, ເປັນຜູ້ສ້າງຮາກຖານແຫ່ງການສຶກສາທາງພຸດທະສາສະໜາ ພາກປະຣິຍັດຢ່າງໝັ້ນຄົງ ໂດຍສະເພາະແມ່ນວິຊາພຣະອະພິທັມ, ໂຮງຮຽນສອນສີລະທັມ, ສະມາຄົມຍຸວະພຸດ, ວາຣະສານພຸດທະວົງສ໌ ແລະຜົນງານອີກມາກມາຍທີ່ທ່ານມີໄວ້ປະດັບໄວ້ແກ່ຊາດ ແລະສາສະໜາ. ເພື່ອນ້ອມລະນຶກເຖິງຄຸນງາມຄວາມດີຂອງພຣະອາຈານໃຫຍ່ຜູ່ມີຜົນງານ ຜູ່ສ້າງຄຸນປະໂຫຍດແກ່ຊາດແລະສາສະໜາຜ່ານມາ.

ໃນງານບຸນ ໄດ້ມີນິທັດສະການກ່ຽວກັບຊີວິດແລະຜົນງານຂອງພຣະອາຈານມະຫາປາລ ອານັນໂທ, ການຟັງປາຖະກະຖາ, ການປະຕິບັດທັມ, ການໃສ່ບາດຖວາຍສັງຄະທານໃຫ້ແກ່ພຣະສົງຈຳນວນ 100 ກວ່າອົງ, ການຮົດສົງເຖຣາພິເສກຈຳນວນ 18 ກອງ. ນັບວ່າເປັນເຫດການທີ່ສຳຄັນຄັ້ງປະຫວັດສາດໃນລາວ ທີ່ໄດ້ຈັດຂື້ນເພື່ອລະນຶກເພື່ອເປັນອາຈາຣິຍະບູຊາຄົບ 100 ປີຊາຕະການແບບນີ້. ມີປະຊາຊົນເຂົ້າຮ່ວມຢ່າງຫລວງຫລາຍເຖິງແມ່ນວ່າຝົນຈະຕົກ. ອັນນີ້ກໍສະແດງໃຫ້ເຫັນວ່າ ສັດທາຂອງສາທຸຊົນຊາວພຸດຍັງເຊື່ອໝັ້ນນັບຖືບູຊາຕໍ່ພຣະພຸດທະສາສະໜາຢ່າງໝັ້ນຄົງແລະເປັນຂະບວນຟົດຟຶ້ນໃນການເຮັດບຸນ.

ການໃສ່ບາດຮ້ອຍແປດ 108

ຮູບຖ່າຍທີ່ວັດອົງຕື້ມະຫາວິຫານ ເມື່ອວັນທີ 24 ຕຸລາ 2010.

ການໃສ່ບາດຮ້ອຍແປດ ໝາຍເຖິງການເອົາຫຼຽນທີ່ຄູບາກຽມໄວ້ແລ້ວໃນຈານນ້ອຍໆ ທີ່ກຳນົດເອົາໄວ້ ໄປປ່ອນລົງໃນບາດຢາງນ້ອຍໆ ທີ່ຕັ້ງ ລຽນກັນເອົາໄວ້. ບາດຮ້ອຍແປດນີ້ ບາງຄັ້ງເພິ່ນກໍເອີ້ນວ່າ ບາດສະຫວັນ ຫຼືວ່າ ບາດເທໂວ ຄວາມເປັນມາຂອງການໃສ່ບາດ ແບບນີ້ຍັງບໍ່ ທັນເປັນທີ່ແນ່ນອນວ່າກຳນົດກັນຂື້ນໃນເມື່ອໃດ. ແຕ່ທີ່ສຳຄັນແມ່ນນິຍົມເຮັດກັນຢູ່ປະເທດໄທ ຕາມທີ່ຜູ້ຂຽນຮູ້ມາຈາກການ ບອກເລົ່າຂອງ ພຣະອາຈານໃຫຍ່ ຜ່ອງ ສະມາເລິກ, ຜູ້ຮັກສາການປະທານອົງການພຸດທະສາສະໜາສຳພັນລາວ ເວົ້າວ່າ ຕອນທີ່ ເພິ່ນລະດົມທຶນສ້າງ ກຸຕິຢູ່ວັດຫລວງປາກເຊໃນຊ່ວງປີ 1950 ນັ້ນ ເພິ່ນໄດ້ນຳເອົາວິທີການໃສ່ບາດຮ້ອຍແປດນີ້ເຂົ້າມາເຜີຍແຜ່ແລ້ວ ແຕ່ຕອນນັ້ນ ຍັງບໍ່ທັນເປັນ ທີ່ຮູ້ຈັກແລະນິຍົມກັນຫລາຍ.ມີບາງຕຳນານບອກວ່າ ການກຳນົດການໃສ່ບາດຮ້ອຍແປດ ຫຼື ບາດເທໂວນີ້ ແມ່ນມີຄວາມເປັນມາ ໂດຍອີງ ໃສ່ປະຫວັດຕອນພຣະພຸດທະເຈົ້າສະເດັດລົງມາຈາກສະຫວັນຊັ້ນດາວະດຶງ ໃນພັນສາທີ 7 ຫຼັງຈາກຕັດສະຮູ້ແລ້ວ. ເພື່ອເທສະໜາໂຜດພຸດ ທະມານດາ ແລ້ວສະເດັດລົງມາຍັງເມືອງມະນຸດ ຈິ່ງຖືເອົາການໃສ່ບາດນີ້ ເພື່ອລະນຶກແລະບູຊາເຖິງເຫດການສຳຄັນນີ້.

ຈຸດປະສົງແລະຄວາມໝາຍຂອງການໃສ່ບາດຮ້ອຍແປດ ມີສອງລັກສະນະຕາມທີ່ນັກປາດອາຈານໄດ້ພັນລະນາເອົາ ຄື : ອັນທີໜຶ່ງ, ເພື່ອ ນ້ອມລະນຶກເຖິງຄຸນພຣະພຸດ, ພຣະທັມ ແລະພຣະສົງ ເຊິ່ງນັ້ນນັ້ນ ຄຸນພຣະພຸດມີ 56 ຄຸນພຣະທັມມີ 38 ແລະຄຸນພຣະສົງມີ 14 ລວມ ເຂົ້າກັນເປັນຮ້ອຍແປດ, ການເຮັດແນວນີ້ແມ່ນເພື່ອບູຊາຄຸນຂອງພຣະຣັຕຕະຣະໄຕ, ອັນທີສອງ ແມ່ນເພື່ອພັກຜ່ອນຈິດໃຈໃຫ້ເປັນ ສະມາທິ ເນື່ອງຈາກວ່າ ໃນຂະນະທີ່ເຮົາໃສ່ບາດ ຖ້າໃຫ້ຖືກວິທີແທ້ ແມ່ນໃຫ້ກຳນົດຈິດຢູ່ໃນຂະນະປັດຈຸບັນ ຕັ້ງຈິດໃຈໃຫ້ໝັ້ນ ເອີ້ນວ່າ ມີສະມາທິ ເມື່ອຈິດໃຈເປັນສະມາທິ ບຸນກຸສົນກໍເກີດຂື້ນໃນຂະນະນັ້ນ ເວົ້າລວມແລ້ວ ແມ່ນເປັນການຝຶກຈິດໄປໃນໂຕ ເຖິງແມ່ນວ່າ ຈະເປັນຊ່ວງເວລາ ອັນສັ້ນ ແຕ່ຖ້າເຮັດໄດ້ ແລ້ວນຳເອົາໄປໃຊ້ໃນຊີວິດປະຈຳວັນ ເຊັ່ນເວລາເຮົາເຮັດວຽກເຮັດງານຢູ່ບ້ານຢູ່ເຮືອນ ຖ້າທຸກຂະນະຂອງ ການເຄືອນ ໄຫວເຮົາມີຈິດຕັ້ງໝັ້ນ ຈົດຈໍ່ໃນວຽກງານ ເຮົາກໍຈະເຮັດໃຫ້ວຽກງານອັນນັ້ນເກີດປະສິດທິຜົນ ແລະໄດ້ຝຶກຝົນສະຕິແລະສະມາທິ ໄປພ້ອມໆກັນ.

ການເຮັດແນວນີ້ ເປັນວິທີທີ່ພຣະສົງໃຫ້ໂອກາດແກ່ຍາດໂຍມໄດ້ຝຶກຝົນ ແລະພັກຈິດໃຈໄປທາງອ້ອມ ພ້ອມດຽວກັນນັ້ນ ກໍເປັນສິ່ງປະກອບ ກັບກິດຈະກຳການໃຫ້ທານຂອງຍາດໂຍມ ແທນທີ່ຈະໃຫ້ເຂົາເຮັດບຸນດຽວກັນບໍລິຈາກທານໂລດ ແຕ່ເມື່ອມີການໃສ່ບາດຮ້ອຍແປດ ກໍໝາຍ ຄວາມວ່າ ພໍ່ອອກ ແມ່ອອກທີ່ມາໃສ່ບາດຮ້ອຍແປດນັ້ນ ໄດ້ມີໂອກາດພຳ່ເພັງບຸນຄົບອົງປະກອບສາມຢ່າງໄປພ້ອມໆກັນ ນັ້ນຄື: ເມື່ອໃຫ້ ທານດ້ວຍການປ່ອນໃສ່ບາດ ຫຼືບໍລິຈາກແລ້ວ ຕໍ່ໄປກໍໄດ້ຝຶກສະມາທິແບບການເຄື່ອນໄຫວ Dynamic meditation ໃນຂະນະທີ່ໃຫຍ່ ບາດຢູ່ ດ້ວຍຈິດຈົດຈໍ່ໃນຄຸນພຣະຣັຕຕະນະໄຕໃນຂະນະປັດຈຸບັນ ເມື່ອຈິດເປັນສະມາທິ ອົງປະກອບທີ່ບໍລິບູນຂອງສິນກໍເກີດຂື້ນ ເພາະວ່າ ເມື່ອໃນອາການທາງກາຍ, ວາຈາ ແລະຈິດໃຈ ເມື່ອນັ້ນເປັນສິນຢ່າງບໍລິບູນ. ອັນນັ້ນ ກໍໝາຍຄວາມວ່າ ການໃສ່ບາດຮ້ອຍແປດ ເຮັດໃຫ້ຜູ້ ໃສ່ໄດ້ພຳ່ເພັງບຸນຄົບສາມຢ່າງ ຄື ທານ, ສີນ, ພາວະນາ ໄປພ້ອມໆກັນ ແທນທີ່ຈະບໍລິຈາກທານຢ່າງດຽວ.